Association CORDAE/La Talvera

Image La Talvera - Copyright La Talvera

L'associacion

Espelida en octòbre de 1979, l'associacion òbra a la conservacion e a la difusion del patrimòni cultural occitan. Sas activitats s'espandisson dins mantunas direccions : la recèrca, l'edicion, la difusion, la creacion e la formacion.

Dempèi sa creacion l'associacion desvolopa un trabalh importent de recèrca etnòlogica e etnòmusicòlogica que se tracha de las comunautats occitanas mas tanben de las comunautats imigradas. Las recèrcas s'alargan ademai al Portugal, al Brasil e dins maites airals del mond.
L'associacion anima tot l'an fòrças classas culturalas, artisticas o de descobèrta, d'estagis de formacion tocant l'aprendissatge de la lenga occitana, de las danças, del cant, e dels instruments de musica... Prepausa tanben una tièra de conferéncias sus mai d'un sicuts ligats a sas recèrcas, e mai de collòcs de seminaris. Mantunas mòstras subre diferentas tematicas (lengatges fiulats, memòrias de l'imigracion, musicas tradicionalas, los personatges fantastiques, los carbonièrs de Gresinha...) realisadas per l'associacion son disponiblas en locacion tota l'annada.

Ambe sas salas de documentacion, de mòstras, de concèrts, d'animacions, son estudiò d'enregistrament, equipats de material informatic e multimedia, lo CORDAE/La Talvera se balhèt una tòca tripla :
- Èsser un vertadièr centre de ressorgas, de recèrca, e de creacion dubèrt a un public lo mai espandit possible de cercaires, d'estudiants, de pedagògues, d'animators e de creators...
- Se vòl en mai una veirina per la cultura occitana e las tradicions oralas ambe tot un tropèl de mòstras, d'animacions, de concèrts e d'estagis... cap als toristas e a un public estrangièr de passatge dins la region.
- Enfin se tracha d'un equipament cultural de proximitat cap a la populacion cordiòla mas tanben cap a la populacion d'Albigés tot, e de l'ensem de la region.

Lo CORDAE/La Talvera trabalha en ligason ambe lo Conselh General de Tarn, lo Conselh Regional de Miègjorn-Pirenèus, lo Ministèri de la Cultura e Euròpa.

Consultar los articles de premsa tocant a l'associacion